韓國：生育控制規定改變引起爭論

原底ê文章

聽聲音檔

韓國食品醫藥品安全廳佇2012年5月初7宣佈講，緊急避孕藥，也就是一般teh講ê「事後早起藥」，以後會當直接買..著。毋過，嘛仝時決定beh kā tsîng-kah-tann會使直接買..著ê非緊急口服避孕藥改做愛有醫生ê處方tsiah提會著。另外，少年囡仔若beh買緊急避孕藥，仝款著愛有醫生開處方。

無張無持有這項關係藥物管制ê改變佇網路hōo人討論kah真激膠，雖bóng醫藥社群內底對緊急避孕藥ê風險參效果ê爭論猶無一个結果，總..是蓋濟韓國ê網路使用者to也對這項政策ê改變表示in無同意。比論蹛韓係來新聞ê一篇文章..裡，就有引婦女權利團體hām特別是未曾嫁娶ê少年查某人ê看法，in批評講這个決策hōo beh買傳統避孕藥變加khah無利便。

TWITTER ê使用者 @redparco 提醒講韓國社會猶原相對tik khah保守嘛khah爸權，對猶未嫁娶ê查某人去看婦產科是kā當做見笑代。

In〔韓國食品醫藥品安全廳〕若beh參考歐洲ê做法，毋就愛先hōo婦產科檢查kap避孕khah方便..leh，就親像佇歐洲國家sio-siāng。上無in嘛著愛提供這款社會氣氛，hōo未曾嫁娶ê韓國查某人去婦產科討口服避孕藥處方ê時感覺khah快活..淡.薄。

@marisusa嘛有sio-siâng ê意見：

「事後早起藥」聽..起.來袂輸是掠暗時發生ê代誌來咧責備女方，若是後擺愛靠事後早起丸 ·ho·ⁿ，欲按呢責備查某人驚見會変愈簡單。

ThinkThink邀請其他ê使用者做伙討論了後，講出伊ê想法，伊臆講政策會雄雄改變，凡勢是增加企業利純ê因端，毋是考慮公共利益。Shin Jae-eun佇伊ê發言下面有做出評論：

設使 [口服]避孕藥變做需要處方，hia-ê要意別人ê看法ê人是無hiah簡單去婦產科..ê，結果，真有可能造成拍thu̍t身（phah-thu̍t-sin）ê比率tshìng懸，生育控制嘛會tōng-tu̍t […] 我徹底反對這號政策。

雖然大多數ê網路使用者對緊急避孕藥ê危險性提出警告，甚至kā叫做「hoo-lú-bóng炸彈」，毋過TWITTER 用戶 @__mangmang 有講著講：

緊急避孕藥，就ná像伊ê號名仝款，有影是「緊急」ê藥丸仔，所以kā伊改做會當隨時買..著，實在講無啥毋著。毋過，假使口服避孕藥hông改做需要處方ê藥仔，對少年人kap佇iap-thiap ê郊外hām細形ê社區徛起ê查某人來講，beh〔暗靜仔（àm-tsīnn-á）〕買著這款藥仔就真oh..ah，差不多thang講是無可能。

婦女權利團體抾外，天主教會嘛kap這項決策對tu，忠凊道ê天主教會甚至佇食品醫藥品安全廳ê頭前示威，in警告講〔緊急避孕〕藥丸仔會損斷咱人ê德行，閣會傳播關係性命ê錯誤價值觀，特別是對hia-ê少年人－毋過這號主張真濟 TWITTER 使用者並無咧kā信táu。

@symadam5佇 TWITTER 寫講：

Hia-ê主張kā緊急避孕藥改做隨時thang買會促成道德落坐（lo̍h-tshē）kap鼓勵拍thu̍t身ê天主教徒kám會是規个uì現實落勾–去-ah？佇咱國，非法拍thu̍t身ê比率hām國際過繼ê比率早就不止仔懸..ah，in ê想像力kán袂siunn過頭譀？設使有人無才調先食口服避孕藥，按呢伊著愛有法度佇hin了後食避孕藥，就是因為按呢，he藥仔毋才會號做「緊急」避孕藥。Kā性交了後72點鐘內食避孕藥ê做法當做是拍thu̍t身的確是譀古代。

這項關係避孕藥做法改變ê政策pān-phue上緊明年就會實施。