Skip to content

韓國人仒"慰安婦"相仒展覽佇日本予人破壞

2012/06/28

原底仒文章http://globalvoicesonline.org/2012/06/27/japan-korean-comfort-women-photo-exhibit-sabotaged/

安世宏,一仒韓國仒攝相師,佇日本開展覽之前佮當中仒時,受人攪亂。伊佇日本展覽已經變老阿婆仒"慰安婦"仒相,就是世界等二大戰予日本掠去做性奴仒㜁某人。日本死硬派也舉行反對這仒相仒展覽。安先嘛講出伊咧予遮人威脅。

佇伊仒面冊,攝相師安世宏講當咧展覽仒時,伊予人隨著著咧監視。來看展覽仒人也予Nikon請來仒保安人員規身搜通通。Nikon是製造相機仒日本公司;展覽仒所在也是這間公司仒。

Nikon頭頭啊呣肯提所在來贊助,也頂個月啊連鞭時取消這仒展覽。呣過最後Nikon嘛著順從東京地方法院仒命令,繼續將所在贊助展覽。新聞媒體推測Nikon欲取消展覽是為著披開爭議佮保守派仒壓力。

韓國網上充滿了憤怒爆發仒用戶指控日本死硬派呣若定呣愛承認怹戰爭仒罪惡,連藝術展覽嘛欲破壞。

安先"一層佫一層:予人放摔佇中國仒日本軍隊仒韓國慰安婦"展出遐無辜仒㜁某人,佇怹十外二十外歲仒時予日本軍隊拖去面對遐呢恐怖仒侮辱,當今已經皮皺佫殘廢。
日本侵略仒時期,約略有五萬至二十萬仒韓國㜁某予日本軍隊掠去做性奴。最後十仒無到七仒會當轉茨。

安先2012年六月廿六號佇伊仒面冊貼頂面仒相佮按呢寫,也人人分貼超過900擺:
今日我到Nikon仒展覽室仒時是歡歡喜喜仒欲準備相仒展覽。但是我一下入去就發現講實事無親像我想仒。Nikon聲聲句句講怹乾單將所在稅咱,其他仒無加做;其實呣是。怹佫有做眞濟:阻止媒體入來採訪,也不准人攝相。而且Nikon也派三仒律師共我隨著著。此三仒律師直直來偷聽我咧講甚麼,也錄我講仒話。我忍著,為著來看展覽仒人客。呣過我感覺是若活佇頂擺仒日本帝國主義仒管轄之下。規展覽仒時Nikon會派律師來是欲找藉題停止我仒展覽。

有一仒來看展仒常客(應該是日本人),欲入來看仒時予Nikon請來仒保安人員搜身軀。

安先佫寫講:
這仒明明是侵犯人權啊。我替遐來看展覽仒逐仒人感覺呣値。
佫有死硬派仒小集會來佇展覽所仒頭前示威。安先講伊從早著預料到有遮仒壓力。

頂禮拜安先有寫講:
後禮拜我欲開始相仒展覽。當今佇日本死硬派強大仒攻擊已經開始啊。有人威脅我,叫我著小心,啊怹對我仒威脅也佫升一級。

另外一人,安雲,佇安先仒面冊分享伊仒經驗:
我佇展覽所仒門口佮Nikon網站找無半項這仒展覽仒信息。當我開門入去Nikon展覽室,保安人員就行來開阮仒皮包佫用金屬探測器檢查阮。彼早起,有幾羣啊死硬派仒咧示威佮做亂。當怹欲將一仒投訴小冊分予我但無成功仒時,怹就佫較大攪亂。有眞濟新聞媒體來採訪,呣過Nikon阻礙阮佮記者講話,藉題講大廈內面無會使採訪新聞仒。當我離開彼仒大廈為了欲閃避保安員仒監察,有兩仒Nikon人員就隨阮到外口來觀阮。有幾仒人啊送花予遐老阿婆 [註:就是遐慰安婦;無清楚是予怹本人抑是將花排佇怹仒相頭前]。但是Nikon阻擋人送花。人所獻仒錢嘛予Nikon仒律師收去,講著遐錢有問題。一切攏遐呢無合理,予我強欲發脾氣。

呣過也有日本人來支持:
有誠濟人來看展覽。有仒向我表示支持,也有眞濟日本人表示同情遮老阿婆啊。今日規日我也感覺困惑也感覺有獎勵。呣過明仔再佫有死硬派計劃欲示威。我呣知影怹會偌吵,抑是Nikon會佫監察偌久,但是遮壞招拍無會倒人對遮老阿婆啊仒支持。

眞濟用戶,親像@iron_heel,寫講怹欲開始拒絕Nikon仒產品。

這呣是遐日本死硬派仒頭一擺激氣著韓國,中國,佮其他仒亞洲人。遮國家仒人佇第二次世界大戰之前佮當中有受日本侵略仒惡毒,就是日本侵略韓國佮中國仒時陣。六月廿一號,這仒Youtube影片引起爭議,因為有日本死硬派仒人員將慰安婦講做是壞㜁某(妓女)。

遮派仒人也抾簽名通欲拆佇美國仒一仒慰安婦仒紀念碑,佫再點𤏲日本佮韓國仒敵意。

李友恩寫作

梁約翰翻譯

Advertisements
No comments yet

发表评论

Fill in your details below or click an icon to log in:

WordPress.com Logo

You are commenting using your WordPress.com account. Log Out / 更改 )

Twitter picture

You are commenting using your Twitter account. Log Out / 更改 )

Facebook photo

You are commenting using your Facebook account. Log Out / 更改 )

Google+ photo

You are commenting using your Google+ account. Log Out / 更改 )

Connecting to %s

%d 博主赞过: